زرده كه مشكل چه داري

                   زرده كه من دل چه داري

   ار كه خوي بنگ اكنم بيان هياري

                     مريدونت همسون كل بختياري

ائل كه تقسيري نداره اكني گله گذاري

          نهليم تينا بمهني مر كه ائل روه بخواري

                   زرده كه مير چه كرديم گله داري

                    پا پيادم چه خور ز نيله داري

زرده كه آلور گرگ نهله رويم خو

                    زرده كه پاها مو ن بستن كه ننيم دو

زرده كه مگو اير اخوي روي رو

                    مو هلم تنگ تو دل تفنگ برنو

                   زرده كه تو دل پاك بي كينه داري

                  زرده كه نبي هفين گم پينه داري

الان سا سر هفين گل كرده پينه

                  هر چه بيني تاته زا و خورزمار پاي كمه خينه

سري افتو ز هسرت كه ندونم دم سو يا كه پسينه

                  دل تنگي آسمونه به زمين شونم نشينه

   ار كج و كله هئدن  مال يونه كه مو ندونم چي داراب رئيس يا قهرمون ممدي و ... بيت خو خو بوندم

تا ترين رهنمون كنين . سر بلند چي زرده كه باين               

ددويل و گويل خو اي آزادينه كه ايما داريم سر تالس ز تي خمون بي كه من

اي ره خيلي ز خوترين پيابل و جونون بختياري با دادن خين خسون ايرون ز

دست شاهون بدكردار درويردن اما سيچه اي شهيدون بي نم نشون مندنه

مو اگم خو يا ليش بياهين من بهترين جا چار مال بختياري ۱۱۰ گور بونديم

۷۰ گور ز هفت لنگ و ۴۰ گور ز چارلنگ و سرسون برد شئر واكل زنيم  تا

ديگرون بدونن كه بيشترين شهيدون ره آزادينه ( مشروته) ايما داديم اما

همه چي رهده به كم ديگرون كه هم آخر آخر ويدن من دو .

يونه هم بدونن كه ار ايما نبيديم ( مشروته ) در كار نبي كه حالا هي بردسه

به سينه ازنن .

در آخر بيا د شهيدون بوئيم ز امام شهيدون گرهده تا شهيدون ره آزادي

و شهيدون انقلاو و شهيدون جنگ تميلي ( تحميلي ) .

خو يا ليش بوم او تيات با رهنمون كن 

بردیا

بردیا نم کر کورش کپ هئد که مهنیس ابو سفت و سخت و من زون لری

بختیاری برد  براور سنگ من فارسی نو ابو  برد نمونه سفتی و سختیه

ای کلمه نشون اده که ایما ریشه مون به کیه گیره.

بنم خدای ممد با تش تیرس           خدای کورش نتیجه  و ندیدس

گویل و ددویل به فرگ ایسا ار نم باختران یا سنندج و یا تبریز یه نمی ز ایما بی چی بختیار شهر

یابختیاران چه اوابی یا چه اکردن به فرگ ایسا نی زین من سر که ای نم وا آلشت کنین ای نم

 ز ایما نئدبا سواتسون نمایندههای میلسسون و روزنامه هاسون نی زین واسر که آمی بامی

 ای نم وا جاس یه نمی ز خمون بو.

سالیان درازیه نم مرکز استان چارمال بختیاری شهر کرد ه درست که کردها چی گویلمونن و

 اخویمسون چی تیامون اما ار هنون جا ایما بین چی برق ای نم اورداشتن  ز ایم قدیم ماد و

پارس با یک آویدن و الان هم کرد و لر بایک ایان و بزون خسون با یک براریم اما یو هم درست

نی که چار آدم دولت من قدیم نمسون نهادن رو یه آبادی ای نم یا مهنه رو یه شهری هو هم

مرکز استان یه قوم کپی بنم لر مر خمون نم نداریم نتریم نمس نیم زاگرس یا بختیاران و.....

ایسا بگوئین راست اگم یا نه   .

ز استوندار خو و  کار کن و مردمدار مون و ز نماینده ها مون من میلس اخویم  که ای برد ز سر

دلمون وردارن.

سر دیار بائین چی که زرده .

خو یا لیش اگم تو قوتم رهنمون کن.

بنم هوکه لر آفرید          زس ددر و کر آفرید

گویل و ددویل امئدوارم هر جا که بوین بدزه بوئین

هر چند یونون که نویسم خندنسون سخته اما چکنم که

نوشتنسون هم سخته ، چنون ننوشیم به زون خمون و

نخندیم و هی دیندا دیگرون دونیدیم تا رهدیم بکوری هی

ز دیگرون خاستیم بمون گن که ایما کهنیم .

هنی جوه شولار کورش بپامونه زونمون زون ساسانی

اما خمون دنگ نئدیم دیگرون اگردن به کورش بو بو اکنن

چنون خمون نگدیم که کهنیم خیلیها اگن ارون یا یونانین

ویا آریائین هیشکی نگد په ایر ایما قوم پارس نئدیم ای

قوم به ای کپی کیه رهده .

چی چویل سوز بائین

خو یا لیش دواره نویسم جون خت رهنمون کن.